ആറാം നമ്പറിൽ ഇനി ഇടം കയ്യന്റെ വെടിക്കെട്ടുകളില്ല ; സുരേഷ് റെയ്ന ക്രിക്കറ്റിൽ നിന്ന് പടിയിറങ്ങുന്നു

ഇന്ത്യൻ ക്രിക്കറ്റ്‌ ചരിത്രത്തിലെ എക്കാലത്തെയും മികച്ച മധ്യനിര ബാറ്റ്സ്മാന്മാരിൽ ഒരാളായ സുരേഷ് റെയ്ന അന്താരാഷ്ട്ര ക്രിക്കറ്റ്‌ മത്സരങ്ങളിൽ നിന്നും വിരമിച്ചു. മുപ്പത്തിമൂന്നുകാരനായ റെയ്ന ടെസ്റ്റ്‌, ഏകദിന, ട്വന്റി ട്വന്റി മത്സങ്ങളിൽ ഇനി കളിക്കില്ല. അതേ സമയം ഐ. പി. എല്ലിൽ ചെന്നൈ സൂപ്പർ കിങ്സിനായി തുടരും.

2005 ജൂലൈ 30ന്  പത്തൊമ്പതാം വയസ്സിൽ ആദ്യമായി ഇന്ത്യക്ക് വേണ്ടി ഏകദിന ജഴ്‌സിയണിഞ്ഞു. ശ്രീലങ്കയായിരുന്നു എതിരാളികൾ. 13 വർഷത്തോളം നീണ്ട ഏക ദിന കരിയറിൽ 226 മാച്ചുകളിൽ നിന്ന് 35.31 ശരാശരിയിൽ  5615 റൺസാണ് സമ്പാദ്യം.  5 സെഞ്ചുറികളും 36 അർദ്ധ സെഞ്ച്വറികളും ഇതിൽപ്പെടും.

ഇന്ത്യൻ ടീമിൽ ധോണിയെപ്പോലെ തന്നെ ഫിനിഷറുടെ റോളായിരുന്നു റെയ്‌നയ്ക്കും . മിക്കപ്പോഴും 40-45 ഓവറുകൾക്ക് ശേഷമായിരിക്കും ബാറ്റിംഗിന് ഇറങ്ങേണ്ടി വരിക. വളരെക്കുറച്ച് പന്തുകൾ മാത്രമേ കളിക്കാനാകുള്ളൂ എന്നുള്ളതിനാൽ വലിയ റൺ വേട്ട നടത്താനും കഴിയില്ല. അതുല്യമായ  പ്രതിഭ ഉണ്ടായിട്ടും 10000 റൺസ് ക്ലബ്ബിലേക്ക് എത്താനാവാതെ പോയത് അദേഹത്തിന്റെ  ബാറ്റിംഗ് പൊസിഷൻ കൊണ്ട് മാത്രമാണ്. ഏകദിനത്തിൽ 93.51 എന്ന മികച്ച സ്ട്രക്ക് റേറ്റുമുണ്ട്. പുറത്താവാതെ നേടിയ 116 റൺസ് ആണ് ഉയർന്ന സ്കോർ.

78 അന്താരാഷ്ട്ര ട്വന്റി -ട്വന്റി മത്സരങ്ങളിൽ നിന്ന് 29.16 ശരാശരിയോടെ 1604 റൺസ്. ഇരുപത്‌ ഓവർ ഫോർമാറ്റിൽ സെഞ്ച്വറി നേടിയ ആദ്യ ഇന്ത്യൻ ബാറ്റ്സ്മാൻ (101*). അഞ്ച് അർദ്ധ സെഞ്ച്വറികളും സ്വന്തമായുണ്ട്. 58 സിക്സെറുകളും 145 ബൗണ്ടറികളുമടങ്ങിയ ട്വന്റി – ട്വന്റി കരിയറിൽ 134.79 ആണ് സ്ട്രൈക്ക് റേറ്റ്.

അക്രമണോൽസക ബാറ്റിംഗ് ശീലമാക്കിയ ബാറ്റ്സ്മാൻ ആയത് കൊണ്ട് തന്നെ വളരെക്കുറച്ച് ടെസ്റ്റ്‌ മത്സരങ്ങൾ മാത്രമേ കളിക്കാൻ സാധിച്ചിട്ടുള്ളൂ. 18 അന്താരാഷ്ട്ര ടെസ്റ്റ്‌ മത്സരങ്ങളിൽ നിന്ന് 26.48 ശരാശരിയോടെ  768 റൺസാണ് സമ്പാദ്യം. ഒരു സെഞ്ച്വറികളും 7 അർദ്ധ സെഞ്ച്വറികളും ഇതിലൊപെടും.

വലം കയ്യൻ ഓഫ് -ബ്രേക്ക് ‌ബൗളർ. 226 അന്താരാഷ്ട്ര ഏകദിന മത്സരങ്ങളിൽ നിന്ന് 36 വിക്കറ്റുകൾ റെയ്‌നയുടെ അക്കൗണ്ടിലുണ്ട്. ടെസ്റ്റിലും  ട്വന്റി -ട്വന്റിയിലും  13 വീതം വിക്കറ്റുകളുമാണ് സമ്പാദ്യം.

ലോക ക്രിക്കറ്റിലെ എക്കാലത്തെയും മികച്ച ഫീൽഡർമാരുടെ പട്ടികയിൽ സുരേഷ് റെയ്നയുടെ പേരുണ്ടാകും എന്നത് പകൽ പോലെ വ്യക്തമാണ്. റിക്കി പോണ്ടിങ്, ആൻഡ്രു സൈമണ്ട്സ്, ഹെർഷൽ ഗിബ്‌സ്, മാർട്ടിൻ ഗുപ്റ്റിൽ, രവീന്ദ്ര ജഡേജ, ബ്രാവോ എന്നിങ്ങനെയുള്ള ലോകോത്തര ഫീൽഡർമാരുടെ സമകാലികനായിട്ട് കൂടി ഒരു ഫീൽഡർ എന്ന നിലയിൽ റെയ്ന ഏറെ ശ്രദ്ധിക്കപ്പെട്ടു.

ബൗണ്ടറി ലൈനിൽ നിന്ന് ചാടി ക്യാച്ചുകൾ എടുക്കുന്നതിലും ഗ്രൗണ്ട് ഷോട്ടുകൾ  തടയുന്നതിലും  ഡൈവ് ചെയ്യുന്നതിലുമൊക്കെ അസാധാരണ മികവ് കൈ മുതലായുണ്ട്.നേരിട്ടുള്ള ത്രോയിൽ ബസ്മാനെ റണ്ണൗട്ടാക്കുന്ന അപകടകാരി. മുഹമ്മദ്‌ കൈഫിന് ശേഷം ഇന്ത്യ കണ്ട ഏറ്റവും മികച്ച ഫീൽഡർ എന്ന് വിലയിരുത്തപ്പെടുന്നു. എല്ലാ ഫോർമാറ്റിലുമായി ആകെയുള്ളത് 167 ക്യാച്ചുകൾ.

ഇന്ത്യൻ പ്രീമിയർ ലീഗിന്റെ ആദ്യ സീസൺ ( 2008) മുതൽ ചെന്നൈ സൂപ്പർ കിങ്സിന്റെ ഭാഗമായിരുന്നു. ഇടക്ക് വെച്ച് ഗുജറാത്ത്‌ ലയൺസിന് വേണ്ടിയും കളിച്ചു. ആ സീസണിൽ ഗുജറാത്തിന്റെ ക്യാപ്റ്റനുമായിരുന്നു.വിലക്ക് നേരിടുകയായിരുന്ന സി. എസ്. കെ 2018യിൽ വീണ്ടും പ്രീമിയർ ലീഗിലേക്ക് തിരിച്ചെത്തി യപ്പോൾ റെയ്നയും ചെന്നൈ ക്യാമ്പിലെത്തി.

അന്താരാഷ്ട്ര ക്രിക്കറ്റിലുള്ളതിനേക്കാൾ റെക്കോർഡുകൾ ഐ. പി. എല്ലിലുണ്ട്. ആകെ കളിച്ചിട്ടുള്ള 193 ഐ. പി. എൽ മത്സരങ്ങളിൽ നിന്ന് 33.34 ശരാശരിയോടെ 5368 റൺസ് ആണ് സമ്പാദ്യം. ഒരു സെഞ്ചുറിയും 38 അർദ്ധ സെഞ്ച്വറികളും ഉൾപ്പെടെയാണിത്. 137.11 കരിയർ  സ്ട്രൈക്ക് റേറ്റുള്ള റെയ്‌നയുടെ ഉയർന്ന സ്കോർ 100 റൺസാണ്.

എല്ലാ സീസണിലും സ്ഥിരതയാർന്ന പ്രകടനം കാഴ്ചവെച്ച ഗ്യാരണ്ടി ബാറ്റ്സ്മാൻ. റൺ വേട്ടയിൽ   ഇന്ത്യൻ ക്യാപ്റ്റനും റൺ മെഷീനുമായ വിരാട് കോഹ്‌ലിക്ക് മാത്രം പിന്നിൽ.  ഒരു കൈ നോക്കിയാലോ എന്ന മട്ടിലുള്ള പാർട്ട്‌ – ടൈം ബൗളിങ്ങിലും എണ്ണിപ്പറയാൻ വിക്കറ്റുകളേറെ. പലപ്പോഴും എതിർ ടീമിലെ ബാറ്സ്മാന്മാർ മികച്ച കൂട്ടുകെട്ട് സൃഷ്ടിക്കുമ്പോഴൊക്കെ ക്യാപ്റ്റൻ ധോണി  ബ്രേക്ക്‌ ത്രൂ ബൗളർ എന്ന രീതിയിൽ സുരേഷ് റെയ്നയെ ഉപയോഗിച്ചിട്ടുണ്ട്.

വലംകൈയ്യൻ ഓഫ് – ബ്രേക്ക്‌ സ്പിൻ ബൗളിങ്ങിലൂടെ ആകെ നേടിയത് 25 ഐ. പി. എൽ വിക്കറ്റുകൾ. നായകൻ ‘തല’ യ്ക്കൊപ്പം  ഉപനായകനായത് കൊണ്ട് തന്നെ സി. എസ്. കെയുടെ ‘ചിന്നത്തല’ എന്നാണ് വിളിപ്പേര്.കഴിഞ്ഞ രണ്ട് വർഷത്തോളമായി ഇന്ത്യൻ ടീമിൽ നിന്ന് പുറത്തായിരുന്നു. ആഭ്യന്തര ക്രിക്കറ്റിലെ മോശം ഫോമും ടീമിലേക്ക് തിരിച്ചെത്തുന്നതിൽ വിലങ്ങുതടിയായി.

ഏറെ അപ്രതീക്ഷിതമായിരുന്നു വിരമിക്കൽ തീരുമാനം  എങ്കിലും നിലവിൽ പ്രതിഭാധനരായ ബാറ്റസ്മാൻമാർ അണിനിരക്കുന്ന ഇന്ത്യൻ ടീമിൽ തിരിച്ചെത്തുക അത്ര എളുപ്പമല്ല എന്ന് 33 കാരനായ ഇടം കയ്യന് തോന്നിയിട്ടുണ്ടാകാം.

സുരേഷ് റെയ്‌നയുടെ വിട വാങ്ങലോടെ  ഒരു കാലത്ത് ഇന്ത്യൻ ടീമിന്റെ അവിഭാജ്യ ഘടകമായ താരം കൂടിയാണ് അപ്രതക്ഷ്യമാകുന്നത്. സഹതാരങ്ങൾ ഐ. പി. എല്ലിലെ റെയ്‌നയുടെ ത്രസിപ്പിക്കുന്ന പ്രകടനങ്ങൾക്കായി കാത്തിരിക്കുകയാണ് ആരാധകർ.